الشاعر مرقص اقلاديوس
قصة الحضارة و سر الحياة
بقلم..مرقص اقلاديوس
...............................
أول ما بدع الإنسان الحضارة
بدعها بحجر.
و أول خصومة بين أخين
بيقولوا.
واحد منهم قتل التانى بحجر.
و بكدة قلوا البشر واحد
قال يعنى كانوا كتير أوى البشر.
و بعدين
عرف الإنسان الحديد
و يا ريته ما عرفه.
صحيح بعد ما عرف الحديد
الحديد نفعه.
لكن إبتدت حروب ياما
أصل الحديد فرعنه و غشه.
لكن الحقيقة المشكلة
ما كانتش الحديد
كانت المشكلة الطمع
و الطمع لما يعشش جوا قلب.
يا ويل الروح منه
و كمان يا ويل الجسد.
ياما الحروب حصدت أعداد
و لسه فى كل جيل
بتاكل عدد ورا عدد.
لأ و دلوقت بقت اليكترونية
و قريب أوى هتبقا نانو.
مش عارف ليه البشر
كدة على البشر هانو...
......................
بيقولوا الحاجة أم الاختراع
سألتهم أنا
طيب و يا ترى مين أبوه؟
قالوا. .واحد كان نفسه يعيش.
رغم إن ربنا ادا البشر حاجات كتيرة
أوقات تسأل واحد
معاك ايه..يقولك مافيش.
مع إن ربنا اداله الحياة نفسها.
و شريكته حقيقى أصيلة.
و عيلين تلاتة
يفرحوا اد ايه ما تقوليش.
يعنى اداله حياة و حب
و فوق دا كله اداله عقل منور
نوع من البقشيش.
و اداله قلب
بيبعمل بيه ايه مش عارف
تفتكر بأه انت ايه اللى ناقصه
يا ريت لو سمحت ما تسألنيش.
..........................
طب هتقوللى خلاص عرفنا
إن ربنا ادا الانسان كل حاجة.
حياة و حب و حكمة .
و الإنسان عاش طول عمره
و لسة عايش بيدور على الفكرة.
لكن الطمع اللى جواه
خلاه استعمل الحجر و الحديد للحرب.
عاش طول عمره بالعقل
نسى من زمان ان له قلب.
و ان ربنا اداله ارادة قوية
تتحدى كل صعب.
لكن يا خسارة
الإنسان مع السنين سر الحياة نسيه.
و بقى يقسى
حتى على أقرب الناس ليه.
عشان يرجع تانى الإنسان إنسان
ربنا و الكون و البشر يفرحوا بيه.
لازم ترجع تانى تفتكر إن
الحنان سر الحياة.....
لازم ترجع تانى تملا و تملى
روحك و عقلك و قلبك بيه.
ملاح بحور الحكمة
مرقص اقلاديوس
تعليقات
إرسال تعليق