الشاعر توفيق بومدين
خود من كلامي حبة
فهمو ووعاه
لا تدير من الحبة قبة
لا تفهمو غلاط
وتهجرني بلا سبة
لا تفالط لا تكون حكار
تدور الساعة نلقاك عاطيها للرغبة
لا زربة على صلاح
للي زربو ماتو
ما فادونا بهزان لكتاف
ما فادتهم زربة
هذا زمان صعيب
خلاني وسط بلادي نشعر بالغربة
بقيت عوال على الوقت يتبدل
بدلوه زادو فيه ساعة
صبح كل واحد عاطيها للمندبة
فين ما مشيت يقولولي حك جنابك
عييت بالحكان حتى جاتني الجربة
ما لقيت خير فصحابي
ما فادني قايد الصربة
شربوني لمرار
شربوه لي فكاس البلار
نساو لمعلق من جناحو
النهار يفضح صباحو
يولي ضحكة عند صحاب النخبة
تبعو جيلالة بالنافخ
مشاو هايمين وعجبتهم الجدبة
عييت نشوف والشوف عماني
ظهري تقوس ودار احدبة
نهار يحنت فنهار
كل نهار نلقاهم بكذبة
شي طبال وشي غياط
والكثير فيدو حربة
باش قتلتي تموت
اليوم راها حدورة وغدا قدامك العقبة
كنت حاسبك يا بنادم همة وشان
ساعة لقيت فراسك جعبة
خايف الزمان يدور عليك
نلقاك داير فعنقك قنبة
دير بحساب كلامي
سير بالمهل وكون فكرون
راه مشى وقت الزربة
توفيق بومدين
تعليقات
إرسال تعليق